Die Gereformeerde Kerk Stellenbosch is in die hartjie van die dorp, digby die Universiteit geleë en behoort aan die Gereformeerde Kerke in Suid-Afrika (GKSA). Lidmate bestaan uit permanente inwoners sowel as ‘n groot aantal studente. Ons glo in die Drie-enige God (God die Vader, die Seun en die Heilige Gees) en ons belydenis is gegrond op dié belydenisskrifte. Eredienste vind elke Sondag asook op Goeie Vrydag, Hemelvaart- en Kersdag plaas. Alle eredienste word deur Ds. Johan van Heyningen gelei, tensy anders aangedui. Ons doel is om ‘n leivoor van God se liefde vir mekaar, na die wêreld, tot eer van God en tot uitbreiding van Sy koninkryk te wees. Ons gemeente funksioneer deur ‘n stelsel van leivore wat verskillende dienste binne en buite die gemeente lewer (kyk onder Leivore).

Oggenddiens – 20 Mei 2012, 09:30

Skriflesing: Verskeie gedeeltes

Preekteks: Sefanja 3:17

Hoofgedagte:

Wat sê God oor jou?

Preekskema:

Ons almal het maar skanse wat ons onsekerheid, ons seer, en bang dat ons nie goed genoeg is nie, wegsteek. Ons het seer, want dinge het gebeur: sondeval en ook dinge in ons eie lewe,
dinge wat mense van ons sê. Maar hoe gaan ons weet wat die Here van ons sê?

Aanddiens – 20 Mei 2012, 19:00

Skriflesing: Prediker 8:1-17

Preekteks: Prediker 8:12b, 17

Hoofgedagte:

Genade: jy hoef nie die lewe te verstaan of te bepaal nie, jy kan dit net met oorgawe volgens God se wil leef!

Preekskema:

Feit is: Ek kan nie die lewe altyd verstaan nie, ek kan nie my lewe bepaal nie, in hierdie wêreld tref teëspoed en hartseer ook gelowiges. Hoe moet ek dan ‘n volheidslewe leef in ‘n gebroke, tydelike lewe? Gryp vas aan God deur die geloof; Aanvaar die menslik onbepaalbaarheid en soms onverstaanbaarheid van die lewe; Leef voluit die lewe wat jy ontvang; Leef volgens God se lewensreëls; Leef die lewe as gawe!